22/02/2012 : Rodin Rakotomanjato : « mpandresy ianao … » (+vidéo)

Nanao tatitra mikasika ny zava-misy any anaty andrim-panjakana ny depiote Rodin androany. Izany dia nentiny indrindra nanaporofo tamin’ny vahoaka fa diso tanteraka ny mpamendrofendro sy ny manantsatso. Raha araky ny filazan’ity CST ity manko dia fandresena amin’ny ampahany betsaka ny asa any anaty rafitra. Ireo lalàna rehetra nandalo teny amin’ny parlemanta roa tonta ohatra dia nahitana soritra ny fandresen’ny foto-kevitra izay nitondrana ny tolon’ny mpandala ny ara-dalàna tao anatin’ny telo taona.

Sary Magro androany

Magro Ankorondrano

Efa nozaraina tamintsika teto fa kasain’ny antenimieran’ny varotra sy ny indostria hamidy ny toerana misy ny Magro eny Ankorondrano. Nambaran’i Rodin Rakotomanjato ary fa nitsipaka izany avy hatrany ny ministry ny varotra Olga Ramalason rehefa nahalala fa efa tapitra ny fe-potoam-piasan’ny biraon’ny CCIAA izay nandefa ny tolo-bidy mikasika ity toerana ity. Araka ny fantatra dia midongy tsy mety miala ireo birao ireo satria efa fomban’ny mpanaraka ny FATE hatrany izany. « Manomboka eto anefa dia ny zanaky ny ara-dalàna no mitondra ny baolina » hoy ny depiote Rodin « ka aoka hahalala oniny ny rehetra ».