27/07/2010 - TMR : fantatr’izao tontolo izao fa misy tanora tsy manaiky ny Fate eto Madagasikara (+vidéos)

Voarain’ny mpitarika ny GIC Joachim Chissano ny taratasy mirakitra ny fanazavana sy ny soso-kevitra avy amin’ny Tanora an’i Marc RAVALOMANANA. Tsy maintsy natao izany fametrahana fehi-kevitra izany mba ho fampahafantarana an’izao tontolo izao fa misy tanora mitsipaka ny fanonganam-panjakana nataon’i TGV sy ny mpanaraka azy. Rehefa noraisin’ireo mpiara-miasa akaiky tamin’i Chissano izany raki-kevitra izany dia afaka nihaona mivantana tamin’ity mpitarika ny mpanelanelana ity ireo mpitarika ny TMR androany. Nambaran’ireo mpitarika ny TMR fa efa eny am-peletanany ny taratasy araka ny nambaran’ny Filoha Mozambikana teo aloha Joachim Chissano.

Dinika Santatra : miverina Dada ‘zay vao afaka midinika ny TMR
“Amboletra tanteraka ny fanatanterahana ny dinika santatra” hoy Aina solotenan’ny TMR sady mpitarika ny MATITA. Raha tena vahaolana no karohina hoy izy dia tokony havoaka daholo ireo gadra politika sy ireo mpanao gazety ary tokony ho afaka hiverina an-tanindrazana malalaka ireo “Chefs de file” izay sesi-tany tsy fidiny any ivelany. “Tokony ahemotra izany fifampidinihana izany” hoy ny Filohan’ny MATITA “fa tsy azo atao ny mifampidinika nefa tsy misy fitoniana ara-politika”.