24/09/2010 - TGV sy ny forongony : Mitady ny hevitra rehetra hibodoana toerana (+vidéo)

Nanomboka tamin’ny fampijanonana ny parlemanta roa, ny fanesorana ireo sefo fokontany, dia izao mifarana amin’ny fanoloana ny ben’ny tànana  rehetra izao , dia tetika avokoa entin’ny Fate hanamafisana ny sezany. Tsy ahoan’ireo akory ny mampahantra ny mpiray tanindrazana aminy, fa ny tena zava-dehibe amin’ireto mpanongam-panjakana ireto dia ny hijanonany faran’izay ela indrindra eo amin’io toerana io, haha be ny kibony. Rehefa feno ny kibony, matevina ny hatony, dia hiala izy ary ny Malagasy rehetra no hihinana fako eo amin’ny toerany. Efa andohalika ny ranombary ankehitriny, miharihary toy ny tafika andrefan-tànana, ny tetik’adin’ny Fate. Manoloana izany dia nanao antso avo amin’ireo rehetra mahatsapa ny antsojay ataon’ny TGV sy ny tariny ny député Zafilahy. “Mila mamondrona hery isika fa raha mitambatra isika lavo iroe fahavalom-pirenena ireo”. Ireo ben’ny tànana izay lasibatry ny didy jadona amin’iza no iantefan’ity antso ity. “Ben’ny tànana toa anareo io, tsy misy tokony atahorana azy. Raha mitambatra isika rehetra, miala ho azy eo io” hoy ity filohan’ny vondrona parlementera TIM ity. Fantatra izao fa dia hisy delegasiona avy  amin’ireo ben’ny tànana ho avy eto andrenivohitra , ary hiaraka hivory sy hifampidinika amin’ny mpitolona, ny amin’ny ho aviny.