21/05/2011 : Ny FATE no voalohany tsy manara-dalàna

Araky ny tatitra nataon’ny BIANCO dia tsy nisy praiminisitra nanao fanambaram-pananana hatramin’ny taona 2009 no mankaty. Ny tany alohan’izay anefa, izany hoe tamin’ny fitondran’ny Filoha RAVALOMANANA Marc, dia nanao izany avokoa. Ny ministra dia zara raha azo isaina amin’ny ratsan-tanana no nahefa izany. Fantatry ny rehetra anefa fa maro amin’izy ireo no nanan-karena tampoka nandritry ny fotoana nipetrahany teo amin’ny fitondrana saingy afenina izany.

Mivelona amin’ny harem-pirenena
Kopaka isasahan’izy ireo hatrizay ny fanondranana ny harem-pirenena amin’ny vidiny mirary. Fangoronan-karena malalaka amin’ireo haren’ny firenena no azahoan’izy ireo manao izany. Trano, fiara lafo vidy, kaonty amin’ny banky tsy misy fanaraha-maso any ivelany : talentan’ny FATE avokoa izany rehetra izany. Mandritra izany anefa dia ny vahoaka Malagasy no poretina amin’ny fampidiran-ketra hamenoana ny banga noho ny fizirizirian’ny mpanongam-panjakana. Raha tsy miziriziry mantsy i TGV sy ny namany dia efa nahazo ny fankatoavana iraisam-pirenena ny fitondrana Malagasy. Io fankatoavana io no hitarika ny fiverenan’ny fanampiana  avy any ivelany ka tsy hahafonganan ny tahirim-bola toa izao. Tsara ny mampahatsiahy fa ambim-bava noho ny fahaiza-mitantana teo amin’ny fitondran’ny Filoha RAVALOMANANA Marc no nampiodinana ny raharaham-panjakana nandritry ny roa taona izao.