20/03/2011 : AS ADEMA notronin’ny Filoha RAVALOMANANA : hahazo NOTAM indray koa ve ?

Niatrika lalao baolina kitra lehibe tany Afrika Atsimo androany ny ekipan’ny ADEMA. Amin’ny maha-filoham-pirenena lanim-bahoaka azy dia nanotrona ireto mahery fo Malagasy ireto ny Filoha RAVALOMANANA Marc. Marihina fa efa mpankafy baolina kitra hatraizay ny Filoham-pirenana ary mijoro hatrany amin’ny maha-raiamandreny azy  ny tenany rehefa misy ny tanora miaro ny voninahitry ny Tanindrazana iombonana.

Sarin'ny Filoha RAVALOMANANA nanotrona ny AS ADEMA

Hanao ahoana ny tohiny
Mialoha ny niaingan’izy ireo teto an-tanindrazana dia nihaona tamin’ny Praiminisitra FATE ireto tanora Malagasy ireto. Ny Filoham-pirenena kosa  vantany vao nahare fa hoany Afrika Atsimo ny AS ADEMA dia nataony tao anaty fandaharam-potoanany avy hatrany ny fanotronana ireto tanora ireto eny an-kianja. Miandry ny tohiny ny mpanara-baovao rehetra sady manontany tena amin’ny mety hasosoran’ny FATE noho ireto sary maro niarahan’ny ADEMA sy ny Filoham-pirenena Marc RAVALOMANANA : hamoahana NOTAM indray ve ny AS ADEMA  ka tsy havela hiverina an-tanindrazana? “Eo tsika mahita izy” hoy ny fitenin’ny tanora ankehitriny.