18/09/2010 - Efa voatokana ho « V » ny fanapahan-kevitra eny Ivato (+vidéo)

Efa voaomana mialoha hiatrika ny fihaonambem-pirenena ny ekipan’I TGV rehetra. Nisy fivoriana maromao nanomanana izany mialoha ary nametrahana paikady hampandresena ny mpanongam-panjakana. “Manana porofo momba izany izahay” hoy ny depiote Zafilahy. Efa nihaona mialoha tamin’ireo mpandray anjara nafarana avy any amin’ny faritra ny raiamandreny mijoro ka tapaka fa izay rehetra mananga-tanana ka manao ny marika “V” ihany no raisina mandritry ny fanapahan-kevitra rehetra. Izay tsy manao izany dia tsy hahazo fitenenana ary tsy  ho afaka haneho hevitra. Mbola manaporofo hatrany ny fiandanian'ireto raiamandreny mijoro ireto izany satria tsy tokony hihaona mialoha amin’ny mpandray anjara mihitsy ny mpikarakara raha tena fanapahan-kevitra mahasoa ny firenena no katsahina. Tsy vitan’izany fa mbola nasain’ny pasitera Ramino Paul, mpitarika ny raiamandreny mijoro, noraisina ihany ny anaran’izay “miseho be vava” rehetra mandritry ny adi-hevitra. “Voaporofo avokoa ireo rehetra ireo” hoy Zafilahy Stanislas “ary efa nomena ny fianakaviambe iraisam-pirenena mba ahafantaran’izy ireo ny tena marina momba ity fivoriana teny Ivato ity”.