17/10/2011 : MAMIFI : mbola tsy miala amin’ny Filoha RAVALOMANANA (+vidéo)

Telo taona latsaka taorian’ny nisian’ny fanonganam-panjakana teto Madagasikara dia mbola manamafy ny fikambanana MAMIFI fa tsy mbola misy ny mahavita ny nataon’ny Filoha RAVALOMANANA raha ny fampandrosoana no resahina. Sahin’ireo mpikambana ny mijoro vavolombelona fa niadana lavitra noho izao ny vahoaka Malagasy tamin’ny fotoana nitondran’ny Filoham-pirenena sady tsy niasa saina loatra tamin’ny resaka fandriam-pahalemana. Noho izany dia manantitra ny fitakian’izy ireo ny hiverenan’ny Filoha RAVALOMANANA haingana an-tanindrazana izy ireo satria izay ihany no ahafahana mamaha izao krizy politika lavareny bodoin’ny FATE izao

Manao antso avo amin’ny fianakaviam-be iraisam-pirenena noho izany izy ireo mba hanao ny fomba rehetra hanamorana ny fanatanterahana izany fiverenan’ny Filoham-pirenena Malagasy izany.

Ankoatr’izay dia takian’ireo mpikambana MAMIFI ihany koa ny amoahana tsy misy hatak’andro ireo gadra politika rehetra mba ahitana marina ny tena fahatoniana mialohan’ny hiatrehana ny tetamita tena izy. Nambaran ‘izy ireo moa fa satria maharary sy mahamenatra aza ny tsy fahafahan’ny samy Malagasy mamaha ny olana dia tena ilaina tokoa ny fahatongavan’ireo iraka miaramilan’ny TROIKA teto amintsika mba hanitsy ny fitondran-tenan’y foloalindahy Malagasy izay tsy nitsahatra ny nijoro ho hery famoretana ny mpiray tanindrazana manohitra ny FATE.