11/02/2012 : Ankolafy RAVALOMANANA : hatsangana ny komity hifanantona amin’ny FFKM (+vidéo)

Amin’izao dingana misy ny raharaha politika eto Madagasikara izao dia tsy maintsy ny Raiamandreny am-panahy no mandray andraikitra handaminana ny olana. Sarotra ho an’ny mpanao politika Malagasy ny mifanantona raha ny fahitana ny olana nefa tsy maintsy misy aloha ny fampihavanana azy ireo vao afaka miroso ny dingana.

Sary androany

Araka ny fampitam-baovao nentin’ny Depiote Jules Andriamaholison teo amin’ny Kianjan’ny Finoana dia hisy ny komity manokana hajoro eo anivon’ny Ankolafy RAVALOMANANA mba hifanantona amin’ny Fiombonan’ny Fiangonana Kristianina eto Madagasikara. Izany dia mba hanentanana ny FFKM hiverina ho mpanelanelana sy mpampihavana mba hahitana ny lalan-kombana. « Tsy tokony ny olana tamin’ny 2009 no atao ho sakana » hoy ny solombavam-bahoaka avy ao amin’ny boriborintany voalohany « fa ny hoavy no banjinina ».

Manam-piniavana ve ?
Isan’ny nampanontany tena ny maro ny lahateny nataon’i tgv tamin’ny 07 febroary teo. Tsy nahitana finiavana hamaha ny olana eto amintsika izany fa fireharehana ho manana ny faratampon’ny fahefana sy manan-jo handidy ny ain’ny olom-pirenena manelingelina ny fahefany. Nolazainy tamin’ny izany fa « efa maty » ny Filoha RAVALOMANANA ho azy. Tsy manambany ny ain’ny mpiray tanindrazana akory sanatria fa raha isaina dia mbola maro lavitra noho ny namoy tamin’ny 07 Febroary 2009 ny matin’ny krizy nateraky ny fanonganam-panjakana notarihin’i tgv. Tao ny matin’ny hanoanana, tao  ireo nizaka ny vokatry ny tsy fandriam-pahalemana ary maro ny niharan’ny herisetra ka nindaosin’ny fahafatesana noho izany. Noho izany raha misy ny daty tokony ho tsarovana dia anisany ny 26 janoary 2009 no mankaty.