08/01/2012 : Filoha RAVALOMANANA : vahiny manan-kajan’ny faha-100 taonan’ny ANC

Manamarika ny faha-100 taonany ny antoko « African National Congress” na ANC atsy Afrika Atsimo. Filoham-pirenena maro no tonga niatrika izany fankalazana izany omaly. Isan’ny nomena haja manokana niaraka tamin’ireo mpitondra Firenena maro aty Afrika ny Filoha RAVALOMANANA Marc ary nasongadin’ny haino aman-jery vahiny malaza maro ny fanatrehany izany lanonana izany. Tsy nisy niresaka momba ny mpanongam-panjakana kosa anefa ireo mpanao gazety ireo na dia nilaza aza I TGV fa nasain’I Jacob Zuma hanatrika izao fankalazana izao.

Horonan-tsary Euronews

Ny tolon’ny ANC
Ny 8 janoary 1912 no niorina ny ANC nentina indrindra nanoherana ny fanavakavaham-bolon-koditra nahery vaika tatsy Afrika Atsimo. Am-polontaonany maro no niadiany ho an’ny fitovian-jo eo amin’ny mainty hoditra sy ny fotsy hoditra. Nitarika ny ANC  tamin’izany Nelson Mandela ary nigadra 27 taona tany an-tranomaizina vokatr’izany tolona izany. Tsy nampihemotra ny mpikatroka ANC anefa izany ary nahitam-bokany  satria ny taona 1994 dia lany Filoha mainty hoditra voalohany nitondra ny Repoblikan’ny Afrika Atsimo Nelson Mandela rehefa nivoaka ny fonja ny 11 febroary 1990.