07/09/2010 - Ho eny amin’ny Viva ny mpitolona…(+Vidéo)

Niaka-peo ny Pasteur Edouard androany teny an-kianja. “Efa tafahoatra amin’ny mety loatra ny hafitsok’ireo mpanentana ao amin’ny onjam-peo Viva”. Raha ny nambaran’ity mpitari-tolona ity ihany dia “mandrangitra adim-poko ny famakafakana ataon’ny mpanentana, ary tsy misy fanajana olona mihitsy ny fandaharana mandeha isan’andro”. Nandefa fampitendremana ho an’ity onjam-peon’ I TGV ity araka izany Pasteur Edouard “ raha mbola mitohy io fampiadiana ny samy Malagasy ataonareo io, dia ho any amin’ny station-nareo izahay ary dia zakao ny vokany”.
Zaza sary
Amin’ny Pasteur Edouard dia ‘’fanjakana’’ tsy manana soram-piankohonana ary zaza sary ihany koa io Fate io. “Tsy mahagaga raha tsy misy mety manome fankatoavana azy ny fianakaviam-be iraisam-pirenena” hoy ny tenany. Tsy fantatra mazava ny mahakasika ity fahefana ity, hany ka tsy zarizary toy izany ihany koa ireo olona manaraka azy.