07/02/2012 : Hadinon’ny FATE ny 26 janoary 2009

Tsy niloa-bava mihitsy i tgv tamin’ny 26 janoary teo na dia fitsingerenan’ny daty nanirahany ny namany handoro sy handroba aza izany. Mbola maro lavitra noho ilay atao dridrangilo amin’ny haino aman-jery androany anefa ireo namoy ny ainy na mivantana na ankolaka tamin’io alatsinainy mainty io. Tsy misy voakitikitika hatreto  ireo tomponantoka tamin’izany satria eo amin’ny fitondrana ilay nitso-drano sy naniraka ary misy porofo mazava izany fa tsy hoe noforonina akory.

Raha tena sahy sy milaza azy fa marina ny FATE dia tokony tsy hisy dinganina toa izany ny tetiandro fa lalovana avokoa izay dingana nataon’ny tantara. Ny raharaha 07 Febroary lalandava no andotoana ny anaran’ny Filoha RAVALOMANANA sy itazomana ireo mpitandro filaminana sasanay any am-ponja nefa ny « lundi noir » odian’ny FATE tsy hita. Na ny dokam-barotra mikasika ny fandihizan’ny FATE teny Ambohitsorohitra androany aza tsy nahitana ny sary tamin’ny 26 janoary 2009 raha tazana tao avokoa ny 10 Aogoristra 1991 sy ny 07 febroary 2009. Miantso ny hamoahana ireo gadra politika ireo tsy misy hatak’andro arak’izany ny fianakaviany sy ireo efa nahazo fahafahana. Tsy sanatria hanakorontana no tanjon’izy ireo fa handamina ny Firenena. Raha mbola misy anefa ny any am-ponja dia ho sarotra ny handamina ny tany satria misy lonilony tsy afaka any ho any.