02/09/2011 : Rodin Rakotomanjato : "Aleo hanao eo ihany ..." (+vidéo)

Tonga ny fe-potoana nomen'i TGV ny SADC hanomezan'izy ireo ny daty hanaovana sonia ny tondro zotra satria nambaran'ny mpanongam-panjakana fa hatramin'ny andron'ny 30 Aogositra no "ultimatum" nomeny ny vondrona SADC hanomezana izany. Ny 01 Septambra dia nanao fanambarana i TGV fa "hiroso amin'ny fanaovan-tsonia na dia tsy eo aza ny SADC". Mivandravandra mampatahotra eo imason'izao tontolo izao ny FATE fa tsy mba mipitrapitra mampalahelo ka toa izy indray no mibaiko an'ireo Filoham-pirenena lanim-bahoaka 14 mpikambana ao amin'ity vondrona aty atsimon'ny Afrika ity.

Fanontaniana no apetraky ny Depioten'Arivonimamo Rodin Rakotomanjato :"iza no hiaraka hanao sonia aminy eo". Efa azo tsapain-tanana ny tsy fahombiazan'ny raiamandreny mijoro tamin'ny fampihaonana ireo vondrona politika teny Ivato ny Alatsinainy sy Talata teo. Raha nolazaina fa ireo hery politika 11 no hanatrika izany fivoriana izany dia nivoaka ireo vondrona enina efa nilaza ny heviny momba ny tondro zotra saingy lasa 20 mahery ny vondrona politika niatrika ny tohin'ny fivoriana. Nolazaina ihany koa fa hanatrika izany ireo masoivoho rehetra miasa sy monina eto Madagasikara saingy tsy nisy na tamingany iray aza. Tsotra ny hevitr'i Rakotomanjato Rodin : "aleo hanao dia ho hita eo fa raha ny fankatoavana iraisam-pirenena tsy ho azon'ny FATE velively".